Plattdeutsch - Der Landesbeauftragte für politische Bildung in Schleswig-Holstein

Plattdeutsch

Plattdeutsch

Sik mit Politik utkennen

in Schleswig-Holsteen

De Lannsbeopdragte för politsche Bildung un sien Kru maakt politsche Bildung för all Börgerslüüd in Schleswig-Holsteen! Allens, wat wi in de Hand nehmt, schall de freeheitlich-demokraatsche Grundordnung Stütt geven un dat Mit’nanner vun Politik un Minschen in Gang holen.

Mit uns Partners bringt wi frische Ideen op den Weg, dat Börgerslüüd mehr vun Politik toweten kriegt. Un wi sett dat ok üm. Wi geevt uns Raatslag ok an de Lannsregerung un den Landdag, wenn dat üm Grundfragen vun politsche Bildung geiht. Dor is keeneen, de uns stüert un de uns den Kurs vörgeven deit.

 

De Lannsbeopdragte

 

Dr. Christian Meyer-Heidemann is vun den Schleswig-Holsteenschen Landdag in’n Novembermaand 2015 mit kloor mehr Ja-Stimmen wählt worrn. De Andrag hett över de Frakschoonsgrenzen weg Stütt kregen. De Amtstiet löppt söss Johr.

Dr. Christian Meyer-Heidemann (1980 op de Welt kamen) is verheiraadt un hett twee Kinner. He hett an de Christian-Albrechts-Universität in Kiel Wirtschaft/Politik un Mathematik studeert. Achteran weer he an de Universitäten Kiel un Vechta wetenschaftlichen Mitarbeider. Sien Dokterarbeit hett he schreven över „Selbstbildung und Bürgeridentität“. Denn hett he an de Leuphana Universität Lüneburg en Professorenstohl för Politikdidaktik vertreden. Bet 2015 hett Meyer-Heidemann de Professur för Wirtschaft/Politik un de ehr Didaktik an de Christian-Albrechts-Universität in Kiel vertreden.

Christian Meyer-Heidemann höört to den Vörstand vun de Sektion „Politikwissenschaft und Politische Bildung“ in de Düütsche Verenigung för Politsche Wetenschaft (DVPW) mit to un is in den Vörstand vun de Börgerstiftung Schleswig-Holsteensche Gedenksteden.

 

Wat wi maakt

Wi maakt Veranstaltungen un Projekten in dat Feld vun de politsche Bildung. De wennt sik an all Lüüd in Schleswig-Holsteen. Vördrääg, Lesungen un Snackrunnen hebbt wi egaalweg in’t Programm. Wi stellt Arbeitsgruppen op de Been un billt Lüüd wieder. Un dat nich blots in de Hauptstadt Kiel, man överall in’t Bunnsland. Dat geiht üm heel un deel ünnerscheedliche Saken. Wi kiekt op dat, wat opstunns in de Politik vun Belang is, man wi kümmert uns ok üm Themen ut dat Land un ut de Geschicht. Wi kiekt över de Grenzen vun uns Land weg un fraagt na dat, wat sik in Düütschland un op de Welt deit. Wo wi Weert op leggt: Dat wi uns Gedanken uttuuscht mit de, de mitmaakt. Wat jüst löppt, finnt Se hier (op düütsch).

In uns Laden köönt Se Böker, Hefen un anner Saken bestellen – wi schickt dat denn to, kösten deit dat nix. In uns Infothek staht ok Videos (dor sünd ok welk bi in mehrere Spraken), Dokumenten un Infografiken, de een vun dor afropen kann. To Lesen un Bekieken gifft dat wat to en ganze Reeg an Themen: To’n Bispeel de düütsche un schleswig-holsteensche Geschicht, denn Europapolitik un Globaliserung, oder vun wat opstunns snackt warrt, as de digitale Welt oder Migratschoon.

 

Schullen Se Fragen hebbt to uns Arbeit oder wenn Se dor wat to seggen wüllt, mellt Se sik bi uns. Wi freit uns över jeden Henwies.

Kaamt Se eenfach mal langs!
De Lannsbeopdragte för politsche Bildung in Schleswig-Holsteen
Karolinenweg 1
24105 Kiel

Roopt Se uns an!
0431 988 1646

Hier schall de Post hen
De Lannsbeopdragte för politsche Bildung
Postfach 7121, 24171 Kiel

Denn köönt Se mit uns snacken
Maandag bet Dunnersdag
vun Klock 8 an’n Morgen bet Klock 3 an’n Namiddag
Freedag vun Klock 8 bet Klock 12 an’n Morgen

Oder Se maakt mit uns en Termin buten de Reeg af.

Schrievt Se uns en Naricht

captcha

*Feller, de utfüllt warrn mööt

Cookies erleichtern die Bereitstellung unserer Dienste. Mit der Nutzung unserer Website erklären Sie sich damit einverstanden, dass wir Cookies verwenden. Außerdem verwenden wir Vimeo und Youtube zur Darstellung von Videos. Nähere Informationen entnehmen Sie unsererer Datenschutzerklärung.